1Cor 10 | HMO | STEP | Lauegu varavara taudia e, iseda sene taudia dekenai dahaka kara idia vara mani umui laloa. Idia be Mose ena murinai idia raka noho neganai ori ta henunai idia noho. Bona idia ibounai Davara Kakakaka aena dekenai idia raka hanaia, mai mauri danu.

1 Corinthians 10

Dibagani neganai do ita gini goada

1 Lauegu varavara taudia e, iseda sene taudia dekenai dahaka kara idia vara mani umui laloa. Idia be Mose ena murinai idia raka noho neganai ori ta henunai idia noho. Bona idia ibounai Davara Kakakaka aena dekenai idia raka hanaia, mai mauri danu. 2 Idia ibounai Mose ena bapatiso idia abia, ori bona davara lalonai. 3 Idia ibounai ese lauma ena aniani tamona idia ania. 4 Bona idia ibounai be lauma ena ranu tamona idia inua. Badina be Keriso ese ia henidia ranu idia inua. Ia be idia danu ia loaloa noho lauma Nadina bamona, edia lauma durua totona. Oibe, unai Nadi be Keriso. 5 To idia momo edia kara be Dirava ese ia ura henia lasi, vadaeni taunimanima idia noho lasi tano dekenai idia mase ore.

6 Unai kara ia vara be ita dekenai toa ta bamona, gau dikadia do ita ura henia lasi, idia ese idia ura henia bamona. 7 Kaivakuku danu do umui tomadiho henia lasi, idia haida idia karaia bamona. Buka Helaga lalonai ia torea bamona, ia gwau, “Taunimanima idia helai diho, idia aniani, muramura kekero idia inua, vadaeni idia toreisi, idia gadara kava, bona sihari kava.” 8 Sihari kava bona heudahanai karadia do ita karaia lasi, idia haida idia karaia bamona. Unai dina tamona lalonai ibounai 23,000 idia mase ore. 9 Lohiabada ena siahu do ita tohoa lasi, idia haida ese idia karaia bamona. Vadaeni gaigai ese unai taudia idia koria mase. 10 Bona Dirava dekenai do ita maumau lasi, idia haida idia karaia bamona. Vadaeni Alaia Aneruna ese idia ia alaia mase.

11 Oibe, iseda sene taudia dekenai unai bamona kara idia vara, be ita dekenai toa bamona, do ita itaia mai gari danu. Edia sivarai danu Buka Helaga lalonai idia torea vadaeni, idia ese ita do idia sisiba henia totona. Badina be tanobada ena dokona be kahirakahira negana ita noho inai.

12 Unai dainai, tau ta bema ia laloa ia gini goada, namona be ia naria namonamo, do ia moru garina. 13 Umui dekenai idia pidia dibagani ibounai ese taunimanima ibounai dekenai danu idia pidia noho. To Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.

Dirava bona lauma dikadia nega tamona umui badinaia diba lasi

14 Unai dainai, lauegu turana lalokau e, kaivakuku dekenai umui tomadiho henia lasi, umui rakatania. 15 Umui be diba taudia. Unai dainai lauegu hereva umui laloa namonamo. 16 Anibou Helaga ita ania neganai, kapusi dekena amo Dirava ita hanamoa. Bona unai kapusi dekena amo ita inua neganai, Keriso ena rarana ita inua hebou, ani? Bona paraoa ita makohia neganai, Keriso ena tauanina ita ania hebou, ani? 17 Ita be momo herea, to paraoa be tamona sibona. Unai dainai ita be tauanina tamona, badina be paraoa tamona ita ania.

18 Israela taudia edia kara mani umui laloa. Boubou vamuna idia ania taudia be Dirava danu pata helagana ena gaukara idia karaia hebou, ani? 19 Lauegu hereva ena anina be dahaka? Kaivakuku dekenai henia boubou gauna be mai anina, a? Kaivakuku danu be gau momokani, a? 20 Lasi! To lauegu hereva ena anina be inai: Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi. Lau ura lasi lauma dikadia danu umui gaukara hebou. 21 Lohiabada ena kapusi bona lauma dikadia edia kapusi ruaosi nega tamona umui inua diba lasi. Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona umui ania diba lasi. 22 Edena bamona? Umui ura Dirava umui habadua, a? Be, iseda goada ese Dirava ena goada ia hereaia diba, a?

Nega ibounai Dirava ita hanamoa be namo

23 Momokani, gau ibounai be taravatu lasi ita dekenai, to namo lasi ita laloa gau ibounai be namo ita dekenai. Gau ibounai be taravatu lasi ita dekenai, to namo lasi ita laloa gau ibounai ese ita do idia hagoadaia. 24 Tau tamona sibona ena namo do ia tahua lasi, to namona be tau haida edia namo do ia tahua.

25 Hoihoi gabuna dekenai idia hoia vamu ibounai umui ania diba. Hoihoi tauna do umui nanadaia lasi, do umui laloa hekwarahi garina. 26 Badina be Buka Helaga ia torea bamona, ia gwau: “Tanobada bona tanobada lalonai idia noho gaudia ibounai be Dirava ena.”

27 Bema Iesu dekenai ia abidadama lasi tauna ese aniani totona umui ia boiria, bona umui ura lao neganai, ia namo, umui lao. Aniani ia henia gaudia ibounai be do umui ania, umui nanadailaia lasi, bona umui laloa momo lasi. 28 To bema tau ta ese umui ia hamaoroa, ia gwau, “Inai be boubou vamuna,” vadaeni unai vamu do umui ania lasi, unai ia hereva tauna ena lalona do umui hadikaia garina. 29 Lau be umui emui lalona totona lau herevalaia lasi, to unai tau ena lalona totona lau hereva, unai vamu do umui ania lasi.

Sedira umui ta ese lau ia henanadaia, ia gwau, “Dahaka dainai lauegu ura lau karaia diba lasi, tau ta do lau hadikaia garina. 30 Bema Dirava lau tanikiu henia, vadaeni lau aniani neganai, dahaka dainai mai tanikiu danu lau ania gauna totona tau ta ese lau do ia gwauraia kerere?”

31 Egu haere be inai: Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona. 32 Umui ibounai do umui noho namonamo, vadaeni Iuda taudia, Iuda lasi taudia, bona Dirava ena ekalesia taudia ese emui kara namo do idia itaia, be do umui hakaudia kerere lasi. 33 Lauegu kara bamona do umui karaia. Lauegu kara ibounai be, taunimanima ibounai ese lau do idia ura henia totona lau karaia. Lauegu namo lau tahua lasi, to ibounai edia namo lau tahua noho, mauri do idia davaria totona.